MEMES POLA IGUALDADE

 O alumnado de 1º Bach elaborou estes memes pola igualdade para conmemorar o 8M

8M. Día Internacional da Muller no Moas

Velaquí tedes o resultado da nosa tradicional actividade sobre mulleres referentes no mundo da cultura. Este ano adicámolo ás "Mulleres activistas" en tódolos ámbitos do saber, un tema que nos pareceu importante hoxe en día, no noso compromiso co presente e co futuro desta sociedade.

A exposición divulgouse de dúas formas, en cartaces impresos na entrada e a través da televisión do centro en formato video, como podedes ver aquí. 

Para conmemorar este día o alumnado de 3º ESO fixo tamén romances ilustrados sobre os seus particulares referentes femininos, unha homenaxe a todas as heroínas que deixan pegada. 

DÍA DA MULLER E DA NENA NA CIENCIA

Este curso, para conmemorar o Día da Muller e a Nena na Ciencia, o alumnado tivo a oportunidade de coñecer diversas facetas de cinco mulleres destacadas na ciencia.   

• Eugenia Pereira, química e farmaceútica galega de principios de século XX, premio extraordinario e doutora en ambas disciplinas.
• Vera Martha Winitzky, matemática arxentina que descubriu a “familia dos números metálicos” entre os que se atopa o número aúreo.
• Jane Goodall, recoñecida primatóloga recientemente falecida.
• Elena Armada, doutora en Enxeñería Industrial, que desenvolveu o primeiro exoesqueleto biónico do mundo para nenos e nenas con parálise cerebral e enfermidades neuromusculares.
• Amparo Alonso catedrática de Ciencias da Computación e Intelixencia artificial da Universidade de A Coruña (UDC).

Nos paneis da exposición ubicada na entrada do centro, diferentes carteis achegaban información relevante sobre o traballo destas científicas, dos que o alumnado puido extraer datos visitando a exposición. Escaneando un QR situado no interior das imaxes de cada unha das mulleres daba a posibilidade de coñecer dunha maneira máis detallada a contribución á ciencia de todas elas.

PARTICIPACIÓN NO PARLAMENTO XOVE

O venres 6 e o sábado 7 de marzo asistimos á fase clasificatoria do Parlamento Xove 2026. Levamos un equipo formado por Antía, Claudia, Lucía e Laura de 1º de bacharelato. Era a primeira vez que acudiamos a este debate co tema A dixitalización mellora realmente a calidade da aprendizaxe?. Aínda que a preparación non foi óptima o resultado foi moi bo e sobre toda unha experiencia marabillosa.

A convivencia cos outros 23 grupos chegados de diferentes puntos de Galicia foi moi enriquecedera e o trato na residencia do Carballiño moi bo.

O Parlamento Xove é unha oportunidade para aprender a debater con argumentos a favor ou en contra do tema proposto e ensina a ter unha resposta rápida e eficiente pois sabes un par de minutos antes de comezar o debate cal é a postura que hai que defender.

As nosas alumnas recibiron os parabéns dos diferentes membros do xurada tanto pola educación, o saber estar, o temple, a rapidez nas respostas, o respecto polo contrincante e tamén pola preparación do tema.

Grazas, raparigas pola vosa valentía, tempo e saber estar.

Para o próximo curso máis!

EXPOSICIÓN DE FOTOGRAFÍAS DE FRASEOLOXÍA

Durante a semana de Rosalía estiveron expostas as fotografías do alumnado da ESO e de 1º de Bach para o Concurso de Fraseoloxía. En breve coñeceremos os nomes das persoas gañadoras que recibirán o seu premio nun acto de entrega na biblioteca.

8M. Exposición de títulos na Biblioteca

 

Xa temos expostos na biblioteca os títulos máis interesantes para ler arredor do Día Internacional da Muller. Tédeos en conta!

TEATRO GRECOLATINO EN LUGO

O alumnado de Latín de 4º ESO e 1º  e 2º Bach viaxou hoxe a Lugo. Ademais de pasear pola muralla romana e polas rúas lucenses nun espléndido día de sol puideron desfrutar destas novas xornadas de Teatro Clásico Grecolatino organizado pola Sección Galega da Sociedade Española de Estudos Clásicos. 

No audirorio Gustavo Freire asistiron á representación teatral de dúas pezas clásicas: a traxedia Medea de Eurípides e a comedia Cásina de Plauto que levou a escena o magnífico grupo de teatro escolar Noite Bohemia.

Á saída do teatro algunhas das actrices entrevistáronos para saber da súa opinión sobre a obra e o papel do elenco principal.

 

VISITA AO MUSEO CARLOS MASIDE E CERÁMICAS DO CASTRO

O venres, 27 de febreiro, en colaboración cos institutos Eusebio da Garda e Otero Pedraio da Coruña e o CEIP de Bergondo fomos a Sada para visitar a fábrica de Sargadelos e o Museo de arte contemporánea Carlos Maside. Ademais de ser unha mañá de convivencia, puidemos ver todo o proceso de fabricación dunha peza de Sargadelos e tamén visitar o Museo. Levamos un caderno de bitácora que o alumnado tivo que ir contestando a medida que avanzaba a visita. A verdade é que foi unha marabilla de visita.

Un pouco de historia

A creación do Museo de Arte Contemporánea Carlos Maside foi o segundo dos proxectos que inaugurou o Laboratorio de Formas en 1970. O Museo, que leva o nome dun dos artistas máis importantes do movemento renovador da arte galega (ao parecer, idea de Rafael Dieste), estaba pensado, segundo Luís Seoane, para conservar e exhibir, partindo de Castelao como xerme da renovación, as obras da arte galega da xeración de artistas dos anos trinta do pasado século, a que rompeu coas normas tradicionais da plástica galega e que era descoñecida a causa da morte, do exilio exterior ou interior e do esquecemento que sufriron gran parte dos seus membros logo da Guerra Civil e da instauración da ditadura franquista. Tamén se recollía no proxecto a conservación e a exhibición das obras dos artistas das xeracións posteriores. Para a creación do Museo asinouse un convenio entre o Laboratorio de Formas e Cerámicas do Castro  en febreiro de 1970. En 1982, o Museo trasladou a súa sede definitiva ao edificio deseñado por Andrés Fernández-Albalat, unha construción de tres plantas, con doce salas de exposicións e un auditorio deseñado por Díaz Pardo. A colección consta de 2100 obras, 500 delas en exposición permanente. Na planta baixa, móstranse as obras de Castelao e do movemento renovador, as dos artistas e movementos desde a Guerra Civil ata a actualidade na segunda, mentres que a terceira está dedicada ao debuxo humorístico e ao cómic.

Concurso de Fotografía e Fraseoloxía no Día de Rosalía

2ª Sesión de "Café con letras"

    O 28 de xaneiro celebrouse a segunda sesión de "Café con letras", o noso Club de lectura de adultos, constituido por persoal docente e non docente. Limos o libro de Abril Camino, Mulleres que viven xuntas, unha novela que resultou gañadora do XLII Premio Xerais de Novela 2025. 

    Trátase dunha historia emotiva e coa carga histórica e social que acompaña a vida de dúas mulleres, Isabel e Chus, ao longo de décadas. Despois de pasar a infancia en Londres, Isabel regresa á súa aldea preto de Compostela nos anos 60 e comeza unha relación profunda con Chus, mestra do pobo que coidou da súa nai. O seu amor, cheo de intensidade e complicidade, vai desenvolverse en segredo debido ao medo aos estigmas sociais e á represión franquista, afectando a súa forma de vivir e de amar.

    Gustounos moito, valoramos a súa sensibilidade, a súa capacidade de conmover e a forza das protagonistas, facendo desta obra unha lectura intensa, delicada e memorable, que combina amor, historia e retrato social nunha Galicia do século XX.

 

Lecturas para o Día Internacional da Muller e a nena na Ciencia

O 11 de febreiro celebraremos o Día Internacional da Muller e a nena na Ciencia. Durante este mes xa tedes no expositor da biblioteca os libros adicados a mulleres referentes neste campo, así como obras de autoras interesantes. Vide a investigar!