EXPOSICIÓN DE MÚSICA EN GALEGO

O alumnado de 4º ESO C realizou estes bonitos e creativos cartaces sobre música en galego para celebrar o éxito de grupos e artistas que achegan a nosa lingua cos sons musicais máis actuais e que arrasan entre a mocidade.

ENTREGA DE PREMIOS DO CONCURSO DAS LETRAS GALEGAS

No segundo recreo de hoxe tivo lugar a entrega de premios ás alumnas gañadoras dos concursos organizados polas Letras Galegas que nesta edición organizamos conxuntamente o EDLG do centro e a ANPA.

A entrega de premios comezou co visionado do vídeo enviado polo poeta, escultor e mariñeiro Xosé Iglesias quen tan xenerosamente nos obsequiou co regalo dunha escultura dun cachalote que foi o premio que recibiu a gañadora do certame de videopoemas, Nerea Sanjurjo Viña de 1º Bach A.

Debido aos seus compromisos laborais non puido acompañarnos neste acto, mais desde o seu barco, o Primeiro Villar, enviou este vídeo no que parabeniza as persoas participantes e onde alenta o alumnado a seguiren creando poesía na nosa lingua.

Para o 1º premio de microrrelatos a gañadora, Marina Martín Allegue de 2º ESO A recibiu o premio que entrega a ANPA e que consiste nun vale de 100 euros para gastar nunha libraría do barrio.

As restantes gañadoras: 2º e 3º premio na categoría de vídeo poemas, Inés Vale Fernández de 3º ESO B, Rebeca Seco Rivas de 4º ESO C; e o 2º e 3º premio na categoría de microrrelatos, Alicia González Leira de 2º ESO B e Manuela Regueiro Bello de 1º ESO C recibiron unha lámina do pintor Victor Rodríguez con motivos marítimos.

Aquí están as fotografías da entrega de diplomas deseñados pola ANPA e de fondo soa parte do videopoema da gañadora.

Parabéns a todas!! Espero que vos gustaran os agasallos e seguide mantendo viva esa creatividade!!

CHARLA CO XORNALISTA E ESCRITOR ÓSCAR LOSADA

Hoxe visitounos en Moas o escritor e xornalista galego Óscar Losada, autor das dúas bandas deseñadas que o grupo de 4º ESO C liu previamente. Desfrutamos dunha entretida sesión na que puidemos coñecer aspectos ben interesantes do proceso de documentación e da confección artística destas obras feitas man a man coas ilustradoras Xulia Pisón e Alba Ceide.

Óscar é un xornalista especializado en temas de cultura e deportes. Membro de World Music Charts Europe, asociación de críticos radiofónicos europeos especializados en música de raíz. É director e editor das revistas deportivas Zona Press e O DEZ, do que nos ofreceu tres exemplares para a nosa biblioteca e que espertaron moita curiosidade entre o alumnado máis afeccionado ao fútbol.

Autor de sete curtametraxes documentais e seis libros foi premiado na categoría de xornalismo, polo seu apoio ao deporte feminino, na V gala de MUDEGA (Mulleres Deportistas Galegas).

Falounos do seu libro Retallos do mundo onde recolle 43 historias que, aínda que algunhas semellan falsas, foron realidade. Os diálogos ficcionados quizais non estean tan lonxe dos que se escoitaron na realidade. Son historias que reflicten retallos do mundo no que estamos a vivir.... Contamos cun exemplar na nosa biblioteca e desde hoxe asinado e dedicado polo seu propio autor.

A súa primeira incursión como guionista de banda deseñada foi con Xulia Pisón en Irene, a porteira, obra que logrou o I premio Tinta de Lura ao mellor cómic galego de 2023. O cómic rescata a historia de Irene González Basanta, unha coruñesa que xogou ao fútbol nos anos vinte do pasado século, Tal e como sinalou Óscar Losada o de Irene González é un caso único no mundo. Na década dos vinte do século pasado foi a primeira rapaza que rompeu barreiras no fútbol, ao se converter na porteira e capitá do equipo masculino coruñés ao que deu nome: o Irene F.C. As crónicas deportivas da época destácana como boa porteira e sinalan que os penaltis sempre os tiraba ela.

E en 2025 viu luz A tese de Margot, onde acompañamos a filóloga alemá Margot Sponer quen en 1926 viaxa a Galicia para investigar a lingua galega, mergullándose na cultura local e coñecendo as súas xentes. A súa tese de doutoramento fai dela unha pioneira na historia do noso idioma.

Nas súas andainas por Galicia forxa amizade con figuras da Xeración Nós, e coñeceremos os posteriores acontecementos vividos no seu país coa presenza constante do nazismo, que empregou os Xogos Olímpicos de Berlín 1936 como un lugar de propaganda do réxime.

É unha historia inspiradora que reivindica o labor profesional e valentía dunha muller afouta.

Foi un pracer poder recibir a Óscar nas nosas aulas e coñecer o xermolo destas dúas BD tan suxerentes que nos levan a homenaxear e afondar na historia de dúas mulleres valentes e pioneiras nos seus respectivos eidos. 

Esperamos que o gusto pola lectura de cómic prenda en vós e que a vosa curiosidade vos acompañe ao longo das vosas vidas para descubrirdes entre libros historias tan fascinantes.

Moitas grazas, Óscar!!

ROTEIRO LITERARIO E CULTURAL POR TERRAS DE BERGANTIÑOS

O alumnado de 3º da ESO e 4º PDC fixo unha saída a Ponteceso para percorrer o roteiro “Val nativo” polo concello bergantiñán, o cal lles permitiu afondar sobre a figura de Eduardo Pondal. Guiados polo escritor e actor Suso Lista, partimos desde a casa natal do poeta e fomos seguindo os monólitos situados en lugares relevantes da biografía do autor e da súa obra. Como o día acompañaba e a situación o merecía, varios alumnos animáronse a ler nas paradas algúns versos de Queixumes dos pinos.

 

Camiñando chegamos ata a aldea do Couto, onde ten a súa sede a Fundación Eduardo Pondal. Alí recibiunos o seu presidente, Xosé María Varela, quen nos falou das actividades que leva a cabo a entidade, como os premios “Bos e xenerosos” ou o festival Festiletras. Despois de facermos unha parada para xantar e achegármonos á praia de Valarés, pola tarde desprazámonos ao concello de Cabana de Bergantiños para visitarmos dúas xoias do patrimonio arqueolóxico galego: o dolmen de Dombate e o castro de Borneiro. Despois dun longo día, regresamos coas pernas cansas mais curtidas nos camiños de Pondal.

Onda Caamaño de A run run Xogos e Enredos, homenaxe a Begoña Caamaño

O alumnado de 1º ESO puido desfrutar hoxe dunha representación teatral moi interactiva no salón de actos do instituto. Tratouse da obra Onda Caamaño da compañia A run run Xogos e Enredos, que é unha proposta escénica que combina teatro e radio para render homenaxe á figura de Begoña Caamaño, unha voz fundamental da cultura galega contemporánea.

A experiencia escénica convértese nun espazo compartido de descubrimento e emoción nunha proposta que constrúe a súa narrativa a partir dun espazo radiofónico ficticio, estreitamente vinculado á traxectoria de Caamaño como xornalista. A través deste formato, reconstrúense lembranzas, ideas e fragmentos da súa vida e pensamento, creando un diálogo co pasado que conecta co público adolescente, que mantivo a atención e o interese durante toda a representación.

PREMIOS NO CONCURSO DAS LETRAS GALEGAS

As persoas premiadas nas dúas categorías do Concurso das Letras Galegas, organizado conxuntamente entre a ANPA e o EDLG do centros son as seguintes:

Categorías de microrrelatos con temática relacionada co mar na que participaba o alumnado de 1º e 2º ESO

1º Premio: "A estrela do ceo de abaixo" de Marina Martín Allegue de 2º ESO A

2º Premio: "Xogar coa area" de Alicia González Leira de 2º ESO B

3º Premio: "Amor de escuma" de Manuela Regueiro Bello de 1º ESO C

Categoría de videopoemas con temática mariña na que participaba o alumnado de 3º e 4º da ESO e 1º Bach

1º Premio: Nerea Sanjurjo Viña de 1º Bach A

2º Premio: Inés Vale Fernández de 3º ESO B

3º Premio: Rebeca Seco Rivas de 4º ESO C

CELEBRANDO OS MAIOS NO CENTRO DE DÍA DE EIRÍS

Este luns 11 de maio celebramos unha das festas máis tradicionais e representativas da cultura galega: os Maios, unha celebración popular que dá a benvida á primavera e que está moi vinculada á natureza, á fertilidade e ao renacer da vida. Desde hai séculos, en moitas vilas e cidades de Galicia, as persoas elaboran maios con flores, fiúnchos, musgo, ovos ou froitas para crear figuras cheas de cor e imaxinación. Ademais, esta festa vai acompañada das coplas, composicións satíricas e humorísticas nas que se comentan feitos da actualidade, costumes ou situacións da sociedade. Os Maios son unha mostra da riqueza do noso patrimonio cultural e da importancia de conservar as tradicións populares que forman parte da nosa identidade colectiva. A través desta celebración, mantemos viva unha festa que une música, creatividade, lingua e participación da comunidade.

É por iso que este curso quixemos ir cantar en contar ao Centro de día de Eirís en colaboración coa biblioteca do Castrillón (co seu grupo Obxectivo Biblioteca) e o CEIP Juan Fernández Latorre. Preparamos unha pequena representación teatral para explicar en que consiste esta celebración, adiviñas para ver se as usuarias do centro eran quen de adiviñar a solución e uns refráns truncados para, entre todos, unir as dúas metades. Tamén nos tiñan preparada unha sorpresa coa canción de Habelas hainas titulada "Maios"

Foi un encontro precioso que deixou caras de satisfacción, alegría e ilusión compartida.

Grazas, Alicia, por abrirnos a biblio!

Grazas, Olga Kirk, por nos aprender a canción tradicional dos maios.

Grazas, Nuria, directora do Centro de Día, por deixarnos entrar nos vosos corazóns.

Grazas, María, por te implicares connosco nesta aventura (mágoa que non puideses vir).

E grazas, rapazada, por deixarvos liar nestas aventuras!