CEIBARRIMAS NAS MOAS, OBRADOIRO DE RAP EN GALEGO

Na maña de hoxe puidemos contar en Moas cun obradoiro ben interesante sobre o rap e a improvisación en galego.

Grazas á colaboración da SXPL achegouse á nosa escola o cantante de Rebeliom do Inframundo, Nervo, quen lles falou da importancia da música en galego e da enorme creatividade e cualidade do hip hop e rap na Galiza actual.

Despois de lles explicar en que consistiu o proxecto Ceibarrimas e de visionaren un vídeo da súa canción Blaquinazo en colaboración con Hard Gz, o alumnado dividiuse en grupos para improvisaren rimas críticas arredor do sistema educativo e nesta presentación podedes ver algúns dos seus marabillosos resultados.

Moito obrigadas a Nervo pola súa dedicación e atención co alumnado que quedou entusiasmado coa visita e motivado para ceibar as súas rimas na nosa lingua, tan necesitada de vitamina de xente moza que viva, cante, soñe e reivindique en galego!!

CEIBARRIMAS NAS MOAS NERVO MARZO 2025 de Remoe a lingua

PALESTRA DE CULTURA BRASILEIRA

No dia de hoje contamos na nossa escola com a presença da professora de português Carla Nepomuceno para impartir uma interessante palestra sobre cultura brasileira à que assistiu o alunado da ESO que estuda essa língua.

Nela puderam conhecer muitas questões da geografia e costumes e tradições do Brasil com especial atenção à região do Matto Grosso de onde é originária a Carla. Conheceram aspetos arredor da gastronomia, da música, dos eventos do Carnaval para além do conhecido samba e festas no Rio de Janeiro e até cantaram várias canções brasileiras que ela nos trouxe.

Adoramos a palestra e além disso alguns alunos conseguiram livros que a professora ofereceu para eles melhorarem o seu português com umas atividades bem interessantes.

O livro Entre rabiscos com atividades de vocabulário para aprender português está também na nossa biblioteca com a dedicatória da sua autora.

Mulleres matemáticas. 8M

Este curso, para conmemorar o 8 de marzo, Día da Muller, os alumnos de 1º ESO A e 3º ESO C, en colaboración coa Bilioteca do centro, elaboraron uns traballos sobre mulleres matemáticas. A través desta iniciativa, quixemos visibilizar o papel fundamental que tiveron moitas mulleres na historia das matemáticas, a pesar dos obstáculos que atoparon no seu camiño.

Cada alumno investigou sobre unha matemática destacada, aportando datos sobre a súa vida e as súas achegas ao mundo da ciencia. Os traballos están expostos para que toda a comunidade educativa poida coñecer e valorar estas figuras imprescindibles.

Foi unha actividade enriquecedora e un gran traballo colaborativo. Noraboa a todos os participantes!

Mulleres de teatro. 8M 2025

Seguindo con esta sentida iniciativa que a comunidade educativa do IES Monte das Moas leva a cabo dende o ano 2014, dámoslles voz esta vez a marabillosas mulleres do mundo do teatro, ben dramaturgas de hoxe e onte, ben actrices que medraron nas táboas dun escenario. Creadoras e actrices galegas, españolas ou internacionais ás que homenaxeamos en consonancia co lema deste curso proposto pola Asesoría de Bibliotecas escolares: "A Biblioteca escolar a escena!". 
Moitas foron as mulleres que ao longo da historia puxeron o seu graíño de area neste apaixonante mundo das artes escénicas, deixando un gran legado tras delas. Aínda que a historia non as recoñeza como se merecen, hai unha gran listaxe de mulleres dramaturgas ao longo da historia e unha non menos importante nómina de actrices famosas que triunfan na escena contemporánea.
Con motivo da celebración do Día da Muller de 2025 imos dar un repaso a algúns deses nomes que, ás veces, quedaron no esquecemento, e que tentaron destacar nun mundo que, ata hai moi poucos anos, estaba reservado única e exclusivamente aos homes.

O vídeo proxectarase nos recreos e o seu contido queda reflectido na exposición que permanecerá estes días na entrada do centro, acompañada de lecturas vinculadas ás mulleres en xeral, e as mulleres de teatro en particular.

ENTROIDO GALEGO

O alumnado de 3º PDC traballou as personaxes do Entroido tradicional galego e deseñou estas máscaras ou cartolinas que estiveron expostas no vestíbulo. 

 

 

I ANIVERSARIO DA BIBLIOTECA INCLUSIVA

Hoxe 28 de febreiro conmemórase un ano da inauguración da Biblioteca inclusiva do IES Monte das Moas, proxecto que se levou a cabo coa iniciativa e inestimable axuda do noso antigo colaborador, Daniel Collazo. 

Gracias, Daniel, polo teu labor e por seguir téndonos presentes.

RECITADO DO DÍA DE ROSALÍA DE CASTRO

RECITADO CONTINUADO DÍA DE ROSALÍA 23 de febreiro de 2025 IES MONTE DAS MOAS de Remoe a lingua

ENTRUDO CHOCALHEIRO PORTUGUÊS

O alumnado de 1º e 2º ESO de Portugués decorou e deseñou estas máscaras do Entrudo tradicional portugués, entre as que destacan os Caretos de Podence de Macedo de Cavaleiros e as máscaras de Lazarim.

Resultaron gañadores dous dos deseños elaborados por alumnado de 1º ESO A.

Debuxo gañador de A. López Viqueira

 

Debuxo gañador de Marina Martín Allegue (1º ESO A)

 

 

RECITAL DO ALUMNADO NO DÍA DE ROSALÍA DE CASTRO 2025

Ao longo destas dúas vindeiras semanas o alumnado da ESO e de 1º Bacharelato acudirá en diferentes quendas á biblioteca da escola para recitar versos de Rosalía de Castro cuxo día se celebra o próximo domingo, 23 de febreiro.

Día da Muller e a Nena na Ciencia, 11 de febreiro

Os diferentes departamentos de Ciencias elaboraron unha exposición para dar a coñecer algunhas mulleres científicas. Os seus nomes realizáronse con combinacións de elementos químicos da táboa periódica. A maioría delas destacaron no eido da xeoloxía, pero os seus coñecementos e formación baseábanse noutra disciplinas, como as matemáticas ou a física, polo que se tratou de poñer de manifesto a importancia do traballo en conxunto das distintas ramas.  

O alumnado dos diferentes grupos visitou a exposición ao longo da semana, coñecendo, mediante a realización de cuestionarios, as contribucións á ciencia destas mulleres, e repasando ou descubrindo á súa vez conceptos básicos relacionados coa táboa periódica.

Ademais, o alumnado de 1º ESO E confeccionou murais e maquetas dos diferentes tipos de células, feito que se aproveitou para dar a coñecer a Lynn Margulis, distinguida científica que, coa súa “Teoría da endosimbiose”, demostrou a orixe das células eucariotas a partir das procariotas".