CHARLA CON ABRIL CAMINO

O luns 27 e abril tivemos a sorte de que nos visitase no centro a escritora Abril Camino para nos falar do seu libro Mulleres que viven xuntas. Esta foi a obra de lectura para o terceiro trimestre do alumnado de 1º de Bacharelato e tamén o lemos no club de lectura de adultas Café con letras. 

Esta obra convidounos a reflexionar sobre as relacións humanas, a convivencia, a amizade, os afectos e tamén sobre os conflitos e os desafíos da vida compartida. En Mulleres que viven xuntas atopamos historias que falan da identidade, da independencia, da procura do propio lugar no mundo e da importancia dos vínculos entre as persoas. A historia de Chus e Isabel amosa esa invisibilidade das relacións entre mulleres ao longo da historia baixo o paraugas da amizade. Foi unha oportunidade moi especial poder coñecer de primeira man o proceso de creación da novela, descubrir como nace unha historia, como se constrúen as personaxes e conversar coa autora sobre os temas que aparecen na obra.

Ademais aproveitamos para que o alumnado expuxese algúns dos magníficos traballos que deseñaron a partir da lectura e mesmo agasallaron a autora con algúns deles.

Grazas, Abril, pola conversa e o tempo compartido.

VISITA DO ALUMNADO DE 4º PDC AO CASTELO DE SANTO ANTÓN E Á TORRE DE HÉRCULES

No mes de abril fixemos dúas visitas a lugares da cidade que non coñeciamos tan detalladamente.

A primeira foi o venres 17 de abril ao castelo de Santo Antón. Foi unha visita guiada grazas ao programa do concello da Coruña de visitas escolares. Foi unha maneira moi agradable de visitar o patrimonio coruñés e de aprender máis da historia de Galicia.

A segunda foi o venres 24 de abril tamén dentro do mesmo programa do concello da Coruña pero desta volta á torre de Hércules. Puidemos coñecer mellor a historia deste faro romano e tamén ter unhas vistas privilexiadas da cidade.

Non hai máis que ver as caras da rapazada para darse conta do ben que o pasaron e do interesante que foron.

Últimas novidades na biblioteca

Coa chegada da primaveira e o Día do libro, o noso expositor da biblio xa está renovado con algunhas das nosas últimas adquisicións. Pasade a velas!

Feira do libro solidaria

Temos xa en marcha a nosa particular Feira do Libro Solidaria, dentro do noso programa anual de actividades polo Día do libro. Trátase de cambiar libros do expurgo da biblioteca por alimentos non perecedoiros, que doaremos ao Banco de Alimentos de A Coruña. A feira estará exposta durante un mes aproximadamente, do 20 de abril ao 20 de maio. Animádevos!

Concurso de microrrelatos polo Día do libro

 

Como todos os anos, a Biblioteca escolar e o Departamento de Lingua castelá, convoca un Concurso de microrrelatos polo Día do libro. Este curso o tema foi libre. Todos os grupos participaron (excepto 2º BAC) e de cada clase sairon dous finalistas. Velaí os tedes expostos na entrada do centro. A finais de maio publicaremos os gañadores. Boa sorte!

Feira do libro solidaria. Charla do Banco de alimentos da Coruña

O venres 10 de abril Pilar, unha voluntaria do Banco de Alimentos da Coruña, estivo no noso instituto para dar unha charla sobre o gran labor solidario que desempeña este organismo na cidade. Asistiron á charla os catro grupos de 1º da ESO, os que se lles deu a benvida a tradicional actividade do Moas polo Día do Libro, o intercambio de libros por alimentos para esta entidade. 

A iniciativa desenvonverase desde o 20 de abril ao 20 de maio, para celebrar o mes das letras. Así que xa sabedes, un libro, un kilo. Agradámosvos!!!

Historia Medieval nos pasillos do Moas

Durante o mes de marzo e principios de abril, tivo lugar a exposición de réplicas, manualidades e traballos de Historia Medieval dos alumnos de 2º ESO. O alumnado dos distintos grupos de dito nivel elaboraron unha serie de materiais didácticos relacionados cos feitos históricos e artísticos do Medievo, dende os reinos xermánicos ata as manifestacións artísticas, pasando polo mundo feudal. Os alumnos elaboraron debuxos artísticos, dioramas, réplicas de obxectos históricos ou escribiron en caracteres cúficos e góticos o seu nome de pila, todo co obxectivo de espertar a súa empatía e curiosidade polo mundo medieval e os seus trazos explicados na aula.