CONCURSO DE MICRORRELATOS ILUSTRADOS DE TERROR

 

 CONCURSO CREATIVOS DE SAMAÍN MONTE DAS MOAS 2024

MICRORRELATOS ILUSTRADOS DE TERROR

BANDA DESEÑADA DE TERROR

O alumnado desde 1º da ESO até 1º de Bacharelato poderá participar en dúas categorías de concursos

creativos de Samaín:

a) Microrrelatos ilustrados de terror

b) Banda deseñada de terror

Poderá presentar un microrrelato e/ou banda deseñada. A presentación poderá ser en formato electrónico (a banda deseñada en formato jpg ou pdf) e será enviado por correo ao seguinte enderezo remoealingua@gmail.com ou entregado ao/á profesor/a de Lingua Galega e Literatura.

O microrrelato ou banda deseñada serán exclusivamente en lingua galega.

O microrrelato non superará a extensión de 150 palabras. Valorarase especialmente a orixinalidade e a calidade narrativa, así como a inclusión de elementos propios do Samaín e da cultura popular galega relacionada coa morte e cos defuntos.

Terá que ir acompañado dunha ilustración de medo que complemente o texto.

A banda deseñada poderá ter a extensión que se queira.

Os traballos entregaranse antes do venres, 25 de outubro e a coordinadora do EDLG, Ana Martínez, será quen os custodiará ata que o xurado se reúna e escolla o mellor relato, cuxo/a autor/a recibirá un premio.

Os microrrelatos gañadores serán lidos, preferentemente pola persoa que os elaborou, nunha lectura dramatizada na biblioteca e expostos no taboleiro do vestíbulo de entrada da escola.

CONCURSO DE PANTASMAS

 

CONCURSO DE CABAZAS, MORCEGOS E ARAÑAS

 

RECOMENDACIÓNS LECTORAS PARA O VERÁN

O curso chega ao seu fin e teremos máis tempo para ler e relaxarnos. Aquí vos deixamos unhas recomendacións para que podades escoller entre as novidades que mercamos este curso na BE. 

Feliz verán a tod@s!!!

VÍDEO DA ENTREGA DE PREMIOS DA BIBLIOTECA

FIN DE CURSO EN BIBLIOMOAS

O pasado venres celebramos na biblioteca o fin do Club de Lectura, entregando diplomas e agasallos pola súa boa participación durante todo o curso. Tamén tiveron este recoñecemento os nosos colaboradores voluntarios de Biblioteca.

Aproveitamos tamén para agasallar os mellores lectores do curso, a meirande parte rapazas e rapaces de 1º de ESO que entregaron os seus "Lecturómetros".  E concedemos os premios do Concurso de Microrrelatos celebrado polo Día do Libro.

Regalos do Concurso de Microrrelatos,
Colaboradores e Mellores Lectores preparados!

Mencía, de 1º BAC, unha das nosas colaboradoras e gran lectora.

EXPOSICIÓN SOBRE OS VERMES DE SEDA

No mes de abril, tras a conmemoración do Día da Muller e a Nena na Ciencia no que se deu a coñecer entre outras científicas a Carol Shaw, o alumnado de 4º de ESO tivo a oportunidade de divertirse cos xogos de Scratch elaborados polo alumnado de programación de 1º de ESO. 

Ao longo dos meses de maio e xuño, nunha actividade dirixida especialmente ao alumnado de 1º de ESO, pero na que puideron participar todas aquelas persoas que o desexaron, contamos no centro cunha exposición sobre os “Vermes da seda”, na que se atopaba información sobre aspectos biolóxicos, lendas, historia e outras curiosidades desta especie, observando ademais en tempo real a metamorfose dos insectos.

Nunhas “minixornadas científicas”, o alumnado de 4º de ESO presentou ao alumnado de 1º de ESO diversos aspectos sobre a evolución, acompañando de xeito fugaz a Darwin na súa viaxe a bordo do Beagle durante o mes de xuño.

REVISTA DO EDLG O SON REBULDEIRO 2024

Como cada curso e desde hai case 30 anos aquí vos presentamos a revista do Equipo de Dinamización da Lingua Galega, O Son Rebuldeiro, onde recollemos todas as actividades desenvolvidas no noso centro e impulsadas desde o EDLG para fomentar e difundir o uso da lingua galega, as actividades literarias e culturais na escola e na contorna próxima do barrio e da nosa cidade.

Foi un curso moi intenso que inauguramos co Proxecto sobre o Reino da Galiza ao abeiro da colaboración coa Deputación da Coruña e grazas ao que hoxe loce na porta da cafetería un fermoso mural de María Balteira realizado por Raquel Xermade e no que puidemos desfrutar dun concerto de Xoán Curiel no salón de actos onde estivo acompañado de alumnado músico da nosa escola.

Foron moitas as efemérides celebradas desde o Día das Escritoras, o Samaín con arrepiantes decorados de medo nos taboleiros das aulas de 1º e 2º ESO, os mundos creativos de Picasso na nosa cidade, o certame de curtas de Cinema Diverso, o concerto de Aldaolado no Ágora, o mes da Ciencia en Galego con deseños e conferencias científicas na nosa lingua, o 25N, o Día da Paz, o 8M cunha exposición de personaxes femininas da banda deseñada acorde coa temática da Asesoría de Bibliotecas deste curso, o Día da Candeloria, o Día da Muller e da Nena na Ciencia, o Mes do Libro, etc.

Na revista recóllense deseños creativos do alumnado como as postais de Nadal en galego, os poemas debuxados na conmemoración do Día de Rosalía de Castro, debuxos para lembrar os 50 anos da Revolução dos Cravos o 25 de abril que realizou o alumnado de portugués, 

Damos mostra tamén da calidade literaria da nosa rapazada que participou no concurso de microrrelatos de terror polo Samaín ou que escribiu relatos propostos nas aulas de Lingua Galega e Literatura.

Unha campaña da que nos sentimos especialmente orgullosas é da participación activa do noso alumnado como dinamizadores lingüísticos nos barrios do Castrillón, Os Castros, A Gaiteira ou Eirís no seo da exitosa campaña Aquí tamén se fala coordinada polo IES Rafael Dieste do barrio da Agra do Orzán, mais que sumou a máis de 100 centros de toda Galiza. Na revista recollemos algunhas das fotos do comercio local implicado na campaña, así como os testemuños de alumnas que participaron nela.

Un lugar especial dentro da revista ocúpano as actividades literarias, como a charla do poeta e mariñeiro Xosé Iglesias no Día da Poesía, o Encontro literario con Paula Carballeira grazas á colaboración do proxecto do MEC e todas as actividades realizadas no Mes das Letras dedicado este ano á xenial poeta coruñesa Luísa Villalta. Outro roteiro literario e cultural organizado conxuntamento co Departamento de Lingua e Literatura Galega foi o de Rianxo arredor da figura de Manuel Antonio.

Coincidindo coa celebración dunha poeta e música, organizamos unha exposición de música en galego con cartolinas e códigos QR a cancións en galego escollidas polo alumnado e que soaron tamén na escola durante os recreos. Elaboramos marcapáxinas sobre esta escritora e realizamos tres interesantes roteiros polas rúas coruñesas arredor da súa obra.

Un apartado especial constitúeno os artigos sobre accesibilidade cognitiva, xa que este ano, grazas ao traballo voluntario dun dos colaboradores do EDLG máis activos, Daniel Collazo Barcia de 4º ESO B, puidemos inaugurar a biblioteca inclusiva e participar nas charlas que el deu ao resto dos compañeiros e das que tamén dá conta nun artigo recollido na revista.

O Son Rebuldeiro2024

Leer más publicaciones en Calaméo

CARTAS DE AMOR

Nesta publicación podedes ver as cartas de amor presentadas ao concurso por parte do alumnado do IES de Monte das Moas e do IES de Monelos, así como as que resultaron premiadas!!

Cartas Amor24

Leer más publicaciones en Calaméo